Thor og BankNordik krevja 5,8 mió. kr. í endurgjaldi frá Fiskimálaráðnum

Eitt gamalt mál er aftur á listanum hjá Føroya rætti í dag.

Talan er um eitt mál frá 2014. 

Reiðaríið Thor og BankNordik stevndu Fiskimálaráðnum, tí eitt skip hjá Thor ikki fekk eitt royndarloyvi at fiska stinglaks.

Endurgjaldskravið hjá Thor og BankNordik móti Fiskimálaráðnum er komið upp í slakar seks milliónir krónur.  

Ætlanin er at málið verður tikið upp til dóms í dag. 

Phoenix fekk ikki fiskiloyvi

Málið snýr seg um djúpvatnstrolaran Phoenix. 

Føroya Banki keypti djúpvatnstrolaran Phoenix á tvingsilssølu 25.november í 2008, og síðst í 2009 keypti Thor skipið frá bankanum.

Phoenix hevði saman við tveimum øðrum skipum royndarloyvi at fiska stinglaks, áðrenn hann fór á tvang.

Vanligt at fiskiloyvi fylgja við

Vanligt er, at fiskiloyvi eru við, tá skip verða seld á tvingilsuppboði. Í bankanum og í Thor hildu tey eisini, at Phoenix hevði royndarloyvi at fiska stinglaks. 

Men har var einki royndarloyvi at fiska stinglaks. 

Tí vilja Thor og BankNordik hava endurgjald frá Fiskimálaráðnum, góðar 5,8 mió. kr., og hava Fiskimálaráðið at viðurkenna, at avgerðin um at strika royndarloyvið er ógildug.