Sarita aftur europameistari

Føroysku røðararnir, sum í hesum døgum kappast í EM í inniróðri í París, hava aftur í dag gjørt vart við seg í kappingini.

Sarita Kristina Hansen er fjórða árið á rað europameistari á bæði 500 og 2000 metra teininum

Hilmar Jan Hansen

28.01.2023 - 13:02

Besta úrslitið fekk Sarita Kristina Hansen, sum annan dagina rað gjørdist europameistari – hesaferð á 2000 metra teininum í lættvekt hjá kvinnum 30+.

Hetta er fjórða árið á rað, at Sarita er europameistari á bæði 500 og 2000 metra teinunum.

Zoe Elisabeth Dickson vann bronsu í lættvekt hjá kvinnum í U23-bólkinum, og er tað annað heiðursmerki hjá henni í kappingini, tí í gjár vann hon silvur á 500 metra teininum.

Hinir fýra røðararnir, sum hava kappast í dag, vóru allir í topp-10 í sínum kappingum, millum annað við trimum fjórðaplássum.

Væl er komið burturúr hjá landsliðnum í inniróðri, tí nú liðugt er, hava føroysku røðararnir vunnið fýra europameistaraheiti, eitt silvurmerki og tvey bronsumerki, umframt framúr góð úrslit annars.