Skattainntøkan hálv millión fyrsta árið - nú er hon 60 milliónir

Nógvir pengar eru settir av til at loysa avbjóðingarnar, sum vit hava havt við drekkivatninum. Arbeitt verður við eini verkætlan, sum eftir ætlan fer at føra til eina góða og varandi loysn. 

Tað segði Súni í Hjøllum, borgarstjóri í Nes kommunu, í røðu sínari leygardagin.

Hátíðarhald var, tí Nes kommunu er vorðin býur.

Sjálvstøðug kommuna í 1967

Nes kommuna er frá 1.apríl 1967. Í kommununi eru bygdirnar Nes, Toftir og Saltnes.

Í 1967 búðu 841 fólk í kommununi, - nú eru tey 1510.

Skattainntøkurnar hjá kommununi vóru 500.000 krónur í 1967. Í ár eru tær næstan 60 milliónir. Tær eru mettar at verða 58,6 mió. kr.

Tað verður ikki so øgiliga stórur munur, nú Nes er býur og ikki longur bygd.

Ein broyting er tó, og hon er, at borgarstjórin kann víga fólk, segði Súni í Hjøllum. 

Toftir, Nes kommuna

Nes kommuna er vaksin nógv, síðani hon gjørdist sjálvstøðug kommuna í 1967. 

Langtíðarskuldin 31,6 mió. kr.

Langtíðarskuldin hjá Nes kommunu við árslok 2022 var 31,6 mió. kr., sum er minni enn helvtin av álíkningini.

Seinastu átta árini eru íløgur gjørdar fyri í miðal 13-14 mió. kr. um árið í Nes kommunu.

Um samstarvið við aðrar kommunur nevndi Súni í Hjøllum eldrasamstarvið Roðan hjá kommununum við Skálafjørðin.

Hann segði, at tað samstarvið hevur verið gott, tó at okkurt kundi verið betri. Hann segði tó ikki, hvat kundi verið betri.