Upphiting til Spæl føroyskt-vikuna beinleiðis í útvarpinum

Spæl føroyskt-vikan verður aftur á skránni 6.-12. mars. Tað verður bæði ein vika, har Kringvarpið fer at spæla føroyskan tónleik burturav, og ein vika við framførslum og framløgum við føroyskum tónleiki um alt landið – og enntá á føroyskum sendistovum úti í heimi.

Tað eru Tónleikasamband Føroya og Kringvarpið, sum samstarva um Spæl føroyskt.

Hæddarpunktið í Spæl føroyskt-vikuni er FMA (Faroese Music Awards), sum verður í Norðurlandahúsinum 11. mars og sent beinleiðis í sjónvarpinum.

Spæl føroyskt hitar upp

Upphitingin til Spæl føroyskt er longu byrjað við fleiri spennandi konsertum við góðum føroyskum tónleiki. Alt frá fólkatónleiki til elektroniskan tónleik.

Tónleikasambandið kunnger líðandi fleiri tiltøk á Facebook-vanganum hjá Spæl føroyskt.

Sunnudagin 5. mars verður almenna setanin av Spæl føroyskt-vikuni í forhøllini í Kringvarpinum, har kringvarpsstjórin, Ivan Hentze Niclasen, og Dánjal á Neystabø, formaður í Tónleikasambandi Føroya, halda røðu.

Setanin verður beinleiðis í útvarpinum aftan á útvarpstíðindini kl. 18.