Ríkisdagurin atkvøður um Nato-limaskap um 14 dagar

Miðað verður eftir at avgreiða alt tað heimliga politiska í sambandi við svenskan Nato-limaskap næstu tvær vikurnar.

Tað segði svenski forsætisráðharrin, Ulf Kristersson, á felags tíðindafundi við Nato-aðalskrivaranum, Jens Stoltenberg, í gjár.

Svenska kringvarpið, SVT, skrivar, at alt tað lógartekniska er komið so mikið langt, at tað bert er spurningur um dagar, og í mesta lagi tvær vikur, áðrenn limirnir í Ríkisdegnum sleppa at atkvøða.  

Gleðir seg

- Eg gleði meg til skjótt at kunna ynskja Svøríki og Finnlandi vælkomnum í Nato-felagsskapin, segði Jens Stoltenberg á fundinum.

Turkaland og Ungarn hava ikki enn tikið endaliga støðu til, um tey taka undir við, at Svøríki og Finnland skulu upp í verjusamgonguna, men arbeitt verður við málinum, og útlitini eru bjartari nú, enn tey vóru fyrr í ár.

Øll limalond í Nato skulu vera samd, tá ið nýtt land skal fáa limaskap.