Øll uttan einstaklingar missa navnloysið

Kravið um navnloysi, tá Dátueftirlitið kunnger sínar avgerðir, skal bara vera galdandi fyri einstaklingar.

Løgmálaráðið ætlar at broyta lógina um at verja persónsupplýsingar.

Dátueftirlitið gjørdi í fjør summar landsstýrismanninum og Løgmálaráðnum greitt, at 
kravið um navnloysi og orðingar, sum gera, at tann, sum avgerðin er um, ikki kann kennast aftur, gera, at Dátueftirlitið illa fær útint uppgávuna at almannakunngera avgerðir.

Avmarkað nyttuvirði

Nyttuvirðið er avmarkað. 

Dátueftirlitið noyðist at strika upplýsingar í avgerðini, sum hava havt týdning fyri 
niðurstøðuna. 

Hetta ger tað trupult hjá lesaranum at skilja, júst hvat tað er, sum er hent í einum máli. 

Í einstøkum førum hevur ikki borið til hjá Dátueftirlitinum at almannakunngera eina týðandi avgerð, tí ikki hevur verið møguligt at greiða frá málinum á nóg góðan hátt. 

Løgmálaráðið mælir til til at broyta lógina, so kravið um navnloysi bara verður galdandi fyri einstaklingar.