Danmark og Frakland í EM-finaluna

Danmark og Frakland vunnu sínar EM-hálvfinalur og skulu dystast um gullið sunnudagin.

Trífaldu heimsmeistararnir úr Danmark høvdu trupulleikar av kroppsligu týskarunum fyri steðgin, men í seinna hálvleiki vóru danir kaldari og týska orkan gekk undan. Heimaliðið misti eisini mótið av málverjanum, Emili Nielsen, sum kom inn og tók omanfyri 40 prosent av skotroyndunum.

Jóhan á Plógv Hansen var ikki við í danska dystarhópinum, og Niclas Kirkeløkke og Hans Lindberg tóku sær av høgra vongi.

Frakland vann á Svøríki í einum sannum gýsara. Sviiar høvdu olympisku meistararnir á knøunum, men við einum fríkasti í síðstu løtu, javnaði Elohim Prandi til 27-27. Sviar vildu vera við, at talan var um eitt óregluligt fríkast og hava sent eina protest til evropeiska hondbóltssambandið.

Í yvirtíðini vóru fraklendingar nógv betri og vunnu dystin 34-30. Finalan verður sunnudagin klokkan 16.45.