Lønin hækkar og tænastumannaeftirlønin fer í søguna

Ein arbeiðsbólkur hevur í dag handað Bjørt Samuelsen, løgtingsforkvinnu, tilmæli um, hvussu tey halda, at lønar- og eftirlønarskipanin hjá tingfólkum skal verða í framtíðini.

Størstu broytingarnar eru, at lønin hækkar úr 34. lønarflokki upp í 36. lønarflokk eftir tænastumannastiganum, men samstundis verður tænastumannaeftirlønin tikin av og løgd um til eina vanliga 15 prosent eftirlønarskipan.

Jógvan Amonsson

Jógvan Amonsson hevur verið formaður í arbeiðsbólkinum. (Mynd: Bjarni Árting Rubeksen)

Skattafría kostnaðarískoytið upp á 2.000 kr. um mánaðin verður eisini strikað.

Lønarsamsýningin hjá løgtingsfólkum verður sambært uppskotinum hækkað úr lønarflokki 34, sum í løtuni er  46.375 kr., upp í lønarflokk 36, sum er 53.058 kr. um mánaðin hjá tænastumonnum landsins.

Hoyr samrøðu, sum Kári Mikkelsen gjørdi við Jógvan Amonsson, formann í arbeiðsbólkinum: 

Bjørt Samuelsen

Bjørt Samuelsen, løgtingsforkvinna, heldur, at uppskotið er áhugavert. (Mynd: Bjarni Árting Rubeksen)

Bjørt Samuelsen, løgtingsforkvinna, heldur, at uppskotið til broyting í samsýningum og eftirløn til løgtingsfólk er eitt gott grundarlag at broyta galdandi skipan:

Lønir og eftirlønir til løgtingsfólk, arbeiðsbólkur og lønir og eftirlønir til løgtingsfólk

(Mynd: Bjarni Árting Rubeksen)

Í gildi eftir næsta løgtingsval

Bjørt Samuelsen fer nú at samskifta við flokkarnar í løgtinginum um, hvussu farast skal víðari við málinum.

Arbeiðsbólkurin mælir til, at broytta skipanin kemur í gildi eftir næsta løgtingsval. Broytingarnar fáa onga ávirkan á lønarviðurskiftini hjá løgtingsfólkum í hesum valskeiðnum.

Álitið frá arbeiðsbólkinum kann lesast her.