Tórshavn Open og Faroe Islands Open - dart í heimsflokki á Glasi

Fleiri dartspælarar í heimsflokki eru við, tá altjóða kappingarnar, Tórshavn Open og Faroe Islands Open, vera á Glasi um vikuskiftið.

Umleið 130 spælarar hava meldað seg til kappingarnar, harav 70 útlendingar úr londum sum Íslandi, Svøríki, Danmark, Onglandi og Týsklandi.

Í kappingini hjá monnum eru fýra spælarar, sum teljast millum 50 teir bestu sambært styrkilistanum hjá WDF, og hjá kvinnunum eru tríggir. Hjá monnunum eru hesir John Scott, Matthew Edgar  og Scott Waalters úr Onglandi og Edwin Torbjørnson úr Svøríki. Hjá kvinnunum er talan um Margaret Sutton úr Onglandi, Maud Jansson úr Svøriki og Gréta Tekauer úr Ungarn.

Undanfarin ár hava bert útlendingar kastað seg til hálvfinalurnar og finalurnar, men vónað verður, at onkur føroyingur klárar tað í ár. Størstu vónirnar eru kanska til Jan McIntosh, sum hevur eitt kvartfinalupláss frá EM í Spania at vísa á.

Kappingarnar verða á Glasir leygar- og sunnudagin frá kl 11.00 til umleið kl 21:00. Hálvfinalur og finalur byrja kl 19:00 og verða allar spældar í Atrium. Sjónvarpsframleiðsla sæst á stórskermi við legendariska stadionspeakaranum Kristian Joensen sum master callara.

Hálvfinalurnar og finalurnar verða eisini stroymdar á kvf.fo.