Føroyskir menn fáa seinni staðfest lungnakrabba enn føroyskar kvinnur

Føroyskir menn fáa seinni staðfest lungnakrabba og verða seinni settir í viðgerð, samanborið við føroyskar kvinnur.

Tað vísir masterritgerð hjá Anniku Haraldsen Lindenskov og Hallu Potts, sum ber heitið "Sex differences in lung cancer in the Faroe Islands". Á føroyskum ”Kynsmunur í yvirlivilsi hjá lungnakrabbasjúklingum í Føroyum”. 

Kanningarnar byggja á tøl hjá føroyskum lungnakrabbasjúklingum í árunum 2015 til 2020.

Og alt bendir á, at tað tekur longri tíð hjá monnum at fáa staðfest lungnakrabba og at verða settir í viðgerð samanborið við kvinnur.

Sjúkan meira framkomin

Kanningin vísir eisini, at sjúkan er meira framkomin, tá menninir fáa staðfest lungnakrabba enn hjá kvinnunum.

Sambært kanningini, tók tað í miðal 46,9 dagar hjá monnum at vera útgreinaðir samanborið við 27,2 dagar hjá kvinnum. 

Tíðarskeiðið frá, at menninir fáa staðfest lungnakrabba og til viðgerðin byrjar, var í miðal 28 dagar og 22,7 dagar fyri kvinnur.

25 prosent doyggja av krabbameini

Hagtøl hjá Hagstovuni vísa, at 25 prosent av øllum andlátum í Føroyum í 2020 skyldaðust krabbamein, harav var lungnakrabbi tað slagið av krabba, sum flest doyðu av.

Títtleikin av lungnakrabba økist í Føroyum samanborið við onnur Norðurlond, har títtleikin fyri menn annars er minkandi, meðan gongdin hjá kvinnum er óbroytt.

Masterritgerðin "Kynsmunur í yvirlivilsi hjá lungnakrabbasjúklingum í Føroyum” kann lesast her.