Sløkkiliðsstjóri: "Eingin serlig tilbúgving finst fyri søguligar bygningar"

Nýliga sóu vit søguliga bygningin Børsen í Keypmannahavnn brenna í grund.

Men hvat um tað kemur eldur í Roykstovuna í Kirkjubø? Ella eldur kemur í eini sethús úti á Reyni í Havn?

Leivur Persson, stjóra í Brunaeftirlitinum, staðfestir, at ábyrgdin fyri søguligu bygningunum er kommunal.

Heini Østerø, sløkkiliðsstjóri

Heini Østerø, sløkkiliðsstjóri í Tórshavnar kommunu (Mynd: Bjarni Árting Rubeksen)

Eingin serlig tilbúgving 

Men hvørji eru so krøvini til søguligu bygningarnir, spurdu vit so Heina Østerø, sløkkiliðsstjóra í Tórshavnar kommunu?

"Eingi," er stutta svarið frá sløkkiliðsstjóranum. 

"Tað finst eingin serlig tilbúgving til gamlar søguligar bygningar í kommununi, men tað burdi tað verið", heldur Heini Østerø. 

Kirkjubø, Kirkjan, Ólavskirkjan, Bóndagarðurin

Roykstovan í Kirkjubø er elsti bygningur í landinum (Savnsmynd)

Eigur at vera ein ætlan

Tað eigur at vera ein ætlan fyri, hvat vit gera um tað kemur eldur í ein søguligan bygning sum Royskstovuna í Kirkjubø ella eini sethús úti á Reyni í Havn, heldur sløkkiliðsstjórin. 

"Tað er Tjóðsavni, sum skal gera eina sovorðna ætlan," sigur sløkkiliðsleiðarin.

Havnar Kirkja hevur eina sokallaða ABA-skipan, so boð verða send alt fyri eitt til Tórshavnar sløkkilið. Eisini bygningarnir á Tinganesi hava somu skipa, og har finnast eisini sprinklarar.

Øðrvísi er við sethúsum úti á Reyni í Havn. Har ber ikki til at seta krøv. Men krøv áttu at verið sett, eitt nú til um tað er loyvt at grilla, heldur Heini Østerø.