55 útlendsk skip við ferðafólkum koma á Havnina

Fyrsta útlendska ferðamannaskipið var í Havn í gjár.

Tað var 128 metra langa Ultramarine, sum er fyrsta skip av 55 í ár. 

Stívliga 100 ferðafólk vóru við.

Skipið fór til Funnings seint í gjárkvøldið.

Síðsta skipið, Hamburg, kemur 1.oktober.

Bæði Ultramarine og Hamburg eru sokallað ekspeditiónsskip.

24 onnur slík koma til Havnar í ár.

Samstarv og limaskapur

Fyrr í ár var gjørt samstarv millum Tórshavnar havn og Visit Tórshavn.

Fólk er sett í starv at taka sær av ferðamannaskipum.

Tórshavnar havn gjørdist í fjør limur í norðuratlantiska umhvørvisfelagsskapinum EPI.

Við tí limaskapinum fær Tórshavnar havn betri grundarlag at vita, hvussu nógv skipini dálka, sigur Hanus Mikkelsen, stjóri hjá Tórshavnar havn.

Tá Ultramarine kom í gjár, kom fyrsta skrásetingin um dálking í dátugrunnin.

Hann skal brúkast til at gera hagtøl um, hvussu nógv hvørt skip dálkar.

Tess meir eitt skip dálkar, tess størri er gjaldið, sum Tórshavnar havn krevur frá tí.