Friðarsamráðingar í Kairo

Semingsfólk úr Egyptalandi og Katar standa fyri friðarsamráðingum millum sendinevndir hjá Hamas og Ísrael. Enn røkist tó ikki fyri friði.

- Ein sendinevnd hjá Hamas kom til Kairo við tí endamáli at fáa frið, men ikki fyri einhvønn prís, segði eitt palestinskt talsfólk við Reuters í morgun.

Ein av størstu snávingarsteinunum er, hvørt avtalan millum partarnar skal vera fyribils ella varandi. Ísraelska sendinevndin krevur, at fleiri av 130 gíslunum, sum Hamas tók í álopinum 7. oktober, verða latnir leysir. 

Hamas krevur millum annað eina varandi vápnahvíld, og at Ísrael tekur allar hermenn sínar úr Gazageiranum.

Benjamin Netanyahu, ísraelski forsætisráðharrin, sigur við The Guardian í dag, at Ísrael ikki fer at ganga krøvunum hjá Hamas á møti.

- Um eg steðgi krígnum í Gaza fyri at fáa gíslarnar leyslatnar, verður Hamas verandi við valdinum, og tað hóttir trygdina hjá Ísrael, sigur Benjamin Netanyahu.

Sambært The Guardian eru fleiri enn 34.000 palestinar dripnir og fleiri enn 78.000 særdir av ísraelskum álopum í Gazageiranum síðani 7. oktober.