Upprit: Landsstýrismaðurin hevur heimild at býta øðrvísi

Fyrisitingin í Fiskimálaráðnum metir, at landsstýrismaðurin hevur heimild at býta svartkjaftin øðrvísi enn higartil. 

Tað vísir innlit, sum Kringvarpið hevur fingið. 

Dennis Holm hevur í kunngerð valt at útluta 35.000 tons av svartkjaftakvotuni í ár sum felagskvotu við hámarki, 2.500 tons fyri hvørt fiskifar.

Metstór kvota

Landsstýrismaðurin vísir á, at svartkjaftakvotan er metstór í ár, heili 543.000 tons, og tí er tað eitt politiskt ynski at býta nakað av hesi kvotuni øðrvísi.

Tað segði Dennis Holm í løgtinginum 11. apríl.

Felagið Nótaskip heldur ikki, at landsstýrismaðurin hevur hesa heimild einsamallur, tað vil siga einans við kunngerð, uttan at broyta sjálva sjófeingislógina.

Felagið fekk tí advokatin Niels Winter Poulsen at gera eina løgfrøðiliga meting. Hansara niðurstøða er tann sama sum hjá Felagnum Nótaskip.

Les niðurstøðuna hjá Niels Winther Poulsen her.

Notat um svartkjaftabýtið, Upprit um svartkjaftabýtið

Niðurstøðan hjá Nielsi Winther Poulsen, advokati, er tann sama sum hjá Nótaskipum.

Eru innan fyri heimildina

Eftir at málið er kært til Umboðsmannin, hevur Kringvarpið nú fingið partvís innlit í eitt samanskrivað notat, ið tekur saman um metingina hjá fyrisitingini í Fiskimálaráðnum.

Notatið er dagfest 29. apríl, tað eru fimm dagar eftir at kunngerðin um broytta svartkjaftabýtið varð lýst.

Í notatinum verður drigið samanum, at heimildin at skipa fiskiskapin er breið, og mett verður, at ein broyting í býtinum av svartkjaftinum í 2024 er innan fyri heimildina.

Stórur partur av tekstinum í innlitinum er strikað yvir. Men sambært tí, sum ber til at lesa, skrivar Fiskimálaráðið, at luturin ella parturin til teir søguligu aktørarnar er ikki greitt ásettur í lógartekstinum, og heldur ikki býtið millum søguligu aktørarnar. Og tí kann hesin bólkur ikki metast at hava ein lógartryggjaðan rætt til ein ávísan part av heildarkvotuni.

Les notatið hjá Fiskimálaráðnum her.

Svartkjaftabýtið fyri 2024 er kært til landsstýrismálanevndina. Fyrrverandi landsstýrismaðurin í fiskivinnumálum, Árni Skaale úr Fólkaflokkinum, hevur kært Dennis Holm, landsstýrismann. Kæran er ikki viðgjørd enn.

Í landsstýrismálanevndini eru umframt Hans Jacob Thomsen, sum er formaður, Bárður á Steig Nielsen og Hanna Jensen.