Zuma óegnaður til tjóðarting

Ein grundlógardómstólur kom í dag til ta niðurstøðu, at fyrrverandi forsetin er ikki egnaður til at sita í tinginum, tí hann í 2021 varð dømdur 15 mánaða fongsulsrevsing fyri at sýna vanvirðing fyri rættinum. Hetta hendi, tá Jacob Zuma noktaði at vitna í eini kanning um mutur í hansara forsetaskeiði.

Jacob Zuma hevur, eftir at hann fór úr stjórnarflokkinum ANC, rikið valstríð sum leiðari fyri nýggja flokkin Um Khonto we Sizwe. 

Floksskrivarin hjá nýggja flokkinum, Sihle Ngubane, sigur at flokkurin er vónbrotin um úrskurðin, og at navnið hjá fyrrverandi forsetanum verður strikað av atkvøðuseðlinum. Myndin av Jacob Zuma verður tó framvegis at síggja á listanum. Í Suðurafrika gera flokkarnir av, hvørji valevni sleppa á ting. Tey ovastu á listanum sleppa inn, alt eftir hvussu nógvar atkvøður listin fær.

Jacob Zuma, sum var forseti í Suðurafrika frá 2009 til 2018, hevur sjálvur ikki gjørt viðmerkingar til avgerðina hjá grundlógardómstólinum.

Nýggi flokkur hansara stendur sambært seinastu veljarakanningunum til at fáa 13 prosent av atkvøðunum til tjóðartingsvalið, skrivar heimasíðan hjá BBC.