Leigubilar fáa ikki undantak at keypa brennievni

Feløgini, sum leiga út bilar til ferðavinnuna, biðja nú um undantak at keypa brennievni til leigubilarnar til ferðafólk.

Í felags áheitan siga bilaleigufeløgini, at tey eru sera hart rakt av verkfallinum, tí einki brennievni fæst til leigubilarnar, nú háárstíðin hjá ferðavinnuni byrjar. 

- At halda ferðafólki í Føroyum sum gísla í einum lokalum stríði millum arbeiðsgevarar og arbeiðstakarar sendir eitt vánaligt signal til ferðandi í Føroyum, og kann føra til óbótaligan skaða í framtíðini, siga sjey bilaleigufeløg í felags fráboðan.

Feløgini skulu tó ikki rokna við, at áheitanin verður gingin á møti.

- Tað kemur ikki upp á tal at geva eitt slíkt undantak, sigur Sonja Jógvansdóttir, samskipari hjá Samtaki.