Óli dagsins maður tá Sävehof tryggjaði sær meistaraheitið

Óli dagsins maður tá Sävehof tryggjaði sær meistaraheitið
Óli Mittún spældi ein frálíkan dyst, tá IK Sävehof vann fjórða finaludystin um svenska meistaraheitið á Ystads og tryggjaði sær fyrsta gullið síðan 2021
Nummar 78 hevur veruliga gjørt vart við seg hetta kappingarárið. Nú kann Óli Mittún eisini kalla seg svenskan meistara
Mynd: IK Sävehof  
 
28.05.2024 - 19:26

Føroyski hondbóltsúrmælingurin Óli Mittún spældi høvuðsleiklutin, tá svenska felag hansara, IK Sävehof, vann fjórða finaludystin í Ystads og samstundis tryggjaði sær svenska meistaraheitið.

Teir gulu og svørtu vunnu dystin á útivølli 27-32, eftir at Ystads var frammanfyri við tveimum í steðginum, og kunnu fegnast um sítt fyrsta gull síðan 2021, tá Elias Ellefsen á Skipagøtu svingaði taktstokkinum í Partille. 

 

Óli í hopla

Óli Mittún hevur verið ein av bestu spælarunum í svensku kappingini hetta kappingarárið - ikki minst eftir árskiftið - og var eisini valdur á ársins lið sum spælskipari.

Í teimum fýra finalunum ímóti Ystads hevur bert 18 ára gamli føroyingurin í stóran mun stjórnað Sävehof-álopsspælinum, og mótstøðumenninir hava heilt einfalt ikki fingið steðgað fótfima føroyinginum.

Tað var sjón fyri søgn í avgerandi dystinum týsdagin. Óli Mittún skeyt níggju mál og legði upp til ikki færri enn átta afturat - eitt framúr avrik undir øllum umstøðum - men serliga við aldrinum hjá hoyvíkinginum í huga.  

 

Rúsandi dagar í føroyskum hondbólti

Talan er um góðar og spennandi dagar hjá føroyskum hondbóltsspælarum og føroyskum hondbólti.

Leygardagin vann Allan Norðberg European Cup saman við liðfeløgunum í íslendska felagnum Vali, og seinni sama dag brustu Jóhan á Plógv Hansen og Hákun West av Teigum saman í European League-finaluni, sum Flensburg-Handewitt vann á Füchse Berlin.

Nú hevur Óli Mittún vunnið sítt fyrsta svenska meistaraheiti við IK Sävehof, har hann tekur ímóti Ísaki Vedelsbøl í summar, og í næstum skal Elias Ellefsen á Skipagøtu royna seg ímóti teimum allarbestu í heiminum, tá THW Kiel brestur saman við Barcelona Champions League-endaspælinum - sonevnda Final Four - í týska býnum Køln.

Er kopiera
Nýggjastu sendingar í ÚV
Hósdag 18. juli
Morgunlestur hósdagur 18. juli 2024
177836
Mikudag 17. juli
Morgunlestur mikudagur 17. juli 2024
177835
Týsdag 16. juli
Morgunlestur týsdagur 16. juli 2024
177834
Mánadag 15. juli
Biltúrurin 5: Koyrt verður í Havn
176612
Nýggjastu sendingar í SV
Týsdag 16. juli
Veðrið
178118
Mánadag 15. juli
Hin rusuti á Aconcagua (3:10)
177771
Leygardag 13. juli
Føroyar - Montenegro (2-1)
178016
Leygardag 13. juli
Landsdystur: Føroyar - Montenegro
178015