Roykfríur dagur í dag: Nýggj roykilóg er á veg

Nýggj roykilóg, fyribyrgjandi átøk og avvenjingartilboð eru á veg, sigur Margit Stórá, landsstýriskvinna, nú altjóða dagur móti tubbaki er í dag.

Lógaruppskotið kemur væntandi í løgtingið í desember. 

Margit Stórá hevur boðað frá, at tey, sum eru fødd í 2015, ella eftir tað, skulu ikki nýta tubbaks- ella nikotinvørur.

Hildið verður, at 130 føroyingar doyggja árliga av sjúkum, sum standast av royking. 

Harafturat koma føroyingar, sum árliga fáa staðfest sjúkur, sum stava frá royking. 

Margit Stórá

Margit Stórá er landsstýriskvinna í heilsumálum.

18 prosent roykja dagliga

Kanningin, “Hvussu hevur tú tað?”, sum Heilsustýrið gjørdi í 2023, vísti, at 18 prosent av føroyingum roykja dagliga. 

Afturat koma tey, sum ikki roykja dagliga, roykja e-sigarettir og snúsa.

Á hvørjum ári síðani 1987 hevur heimsheilsustovnurin WHO skipað fyri einum altjóðadegi móti tubbaki tann 31. mai. 

Í ár varpar WHO ljós á ung og tubbaks- og nikotinnýtslu.