Nato stúrir fyri russiskum stuðli til Norðurkorea

Russiski forsetin Vladimir Putin er á vitjan í Norðurkorea, har hann hittir norðurkoreiska leiðaran, Kim Jong-un.

Norðuratlantiska verjusamgongan Nato er stúrin um møguligan russiskan stuðul til rakett- og kjarnorkuætlaninar hjá Norðurkorea. 

Tað segði Jens Stoltenberg, aðalskrivari í Nato í gjár.

- Vit eru sjálvandi stúrin um møguligan stuðul, sum Russland veitir Norðurkorea, tá ið tað snýr seg um rakett- og kjarnorkuætlanir hjá teimum. Vit síggja, hvussu nógvan hernaðarstuðul Russland fær úr Norðurkorea, men eisini úr Iran, og hvussu Kina fyllir í krígsbúskapin, segði Jens Stoltenberg.

Jens Stoltenberg og Antony Blinken

Jens Stoltenberg, Nato-aðalskrivari, og amerikanski uttanríkisráðharrin, Antony Blinken, á tíðindafundi í Washington í gjár. (Mynd: Reuters/Ritzau Scanpix)

Styrkja samlagið

- Tað er eisini ein av orsøkunum til, at Nato og Nato-fundurin her í Washington í næsta mánaði fara at styrkja samlagið við limir okkara í Asia, Kyrrahavinum, Avstralia, Ný Sælandi, Suðurkorea og Japan. Eisini fyri at svara sannroyndini aftur, at avbjóðingarnar, sum tey síggja, og vit síggja í Asia og Kyrrahavsøkinum, eru beinleiðis knýttar at avbjóðingunum, sum vit síggja í Evropa.  

Amerikanski verjumálaráðharrin Antony Blinken segði á tíðindafundinum, at Russland roynir í ráðaloysi at styrkja viðurskifti síni við lond, sum kunnu veita Russlandi tað, sum Russland hevur brúk fyri, fyri at halda fram við krígnum í Ukraina.