- Tíðindi, mentan og ítróttur
Kappingareftirlitið: Dómurin hevur nógv størri týdning enn upphæddin
Fyrrapartin segði Føroya rættur dóm í málinum, sum ákærumyndugleikin hevði reist móti FT Samskifti, fyri at felagið hevði brotið kappingarlógina.
Málið bygdi á tað arbeiðið, sum Kappingareftirlitið hevði gjørt og er nú endaliga avgreitt frá rættinum við einari bót uppá tríggjar milliónir krónur.
Upprunaliga var talan um tvey mál, har ákærumyndugleikin legði upp til eina bót uppá tilsamans 45 milliónir krónur, men hartil kom tað ongantíð.
Fyrst og fremst tí, at størra málið, tað upp á 27 milliónir krónur, fall burtur, tí Føroya Tele kærdi til Kappingarráðið og fekk viðhald.
Og nú er tað seinna málið so endað við einari semju, har FT Samskifti viðgongur at hava brotið kappingarlógina og fyri tað fær felagið tríggjar milliónir krónur í bót.
Hóast tað kann virka sum eitt rættiliga stórt lop frá 45 milliónum krónum niður í tríggjar, so hevur tað ongantíð verið upphæddin í sjálvum sær, sum hevur havt týdning.
Heldur eru tað møguleikarnir fyri einari góðari kapping millum aktørarnar á marknaðinum.
Hoyr innslag í útvarpstíðindunum