Ivasamt um Le Pen fær avgjørdan meiriluta

Hóast Rassemblement National fekk meir enn triðju hvørja atkvøðu í fyrra valumfarinum í Fraklandi farna sunnudag, so er ivasamt, um tað fer at eydnast flokkinum at fáa avgjørdan meiriluta í franska tjóðartinginum.

Seinna valumfarið verður nú sunnudagin, og sjálvt um Marine Le Pen, sum var forkvinna í flokkinum árini frá 2011 til 2021, væntar, at tað ber til hjá flokkinum at fáa avgjørdan meiriluta, so siga veljarakanningarnar nakað annað.

Flokkurin hevur gjørt greitt, at hann bara fer at skipa stjórn, um hann hevur ein avgjørdan meiriluta.

289 tingsessir krevjast

Fyri at fáa tað skal flokkurin hava í minsta lagi 289 av teimum 577 tingsessunum í franska tinginum.

Men danska kringvarpið skrivar, at seinastu meiningakanningarnar geva Rassemblement National millum 200 og 240 tingsessir - og haðani er langt upp á 289.

Kortini er Marine Le Pen bjartskygd upp undir seinna valumfarið sunnudagin.

"Til seinasta valið fyri tveimum árum síðan var spátt, at vit fóru í mesta lagi at fáa 46 tingsessir, men vit fingu 89. Mín kensla er, at alt hetta snýr seg um at fáa okkara veljarar at missa mótið. Men tíbetur kenni eg okkara veljarar," segði hon við miðilin CNews fyrr í dag.