Amerikanskir miðlar: Biden fer at taka seg aftur

Amerikanskir miðlar siga nógvar søgur um, at Joe Biden ætlar at taka seg aftur sum forsetavalevni hjá demokratunum.

Fyri einari viku síðani segði Joe Biden, at bara Gud kundi fáa hann at taka seg aftur.

Men síðani hevur hann verið fyri stórum trýsti, serliga innanhýsis í demokratiska flokkinum.

Mikudagin bað ein navnframur demokratur, Adam Schiff, Joe Biden taka seg aftur.

Og blaðið New York TImes hevur skrivað nógv um, at demokratar vilja hava Joe Biden at taka seg aftur, og royna at trýsta hann til tað.

Demokratiski senatorurin úr Montana, Jon Tester, heitir nú á Joe Biden um ikki at stilla uppaftur.

- Hóast eg virði arbeiði hansara fyri land okkara, haldi eg ikki, Joe Biden eigur at stilla uppaftur sum forseti enn eitt skeið, sigur senatorurin sambært blaðnum Daily Montana.

Aðrir senatorar og limir í umboðsmannatinginum hava eisini heitt á Joe Biden um lata onkran annan stilla upp.

Trýstið hevur serliga verið, eftir at Joe Biden herfyri stóð seg sera illa móti Donald Trump í beinleiðis sjónvarpskjaki.

Og trýstið gjørdist ikki minni, tá tað í gjár var boðað frá, at Joe Biden hevur fingið koronu, og er farin í sóttarhald við hús í Delaware.