Mesta lønin fer til at umsita almannaveitingar

Størsti lønarbólkur í Føroyum er tann, sum í yvirlitinum hjá Hagstovuni eitur almenn umsiting og verja, lógarkravdar almannavetingar.

Hann var eina milliard og 880 milliónir krónur frá juli í fjør til juni í ár.

Tað eru átta prosent meira enn frá juli 2022 til juni 2023.

Hetta er tó ikki størsta hækkingin seinasta árið.

Í bólkinum, sum eitur søla, útleiga og umsiting av fastognum er vøksturin 12,7 prosent.

Í bólkinum undirvísing er hann 10,8 prosent, hann er 10,2 prosent í list, undirhaldi og ítrótti, 9,3 prosent í heilsu- og almannaverkinum og níggju prosent í bólkinum, sum eitir el-,gass- og fjarhitaveiting.

Tveir minkaðir

Í tveimum lønarbólkum er minni goldið í lønum seinasta árið enn undanfarna ár.

Tað eru bólkarnir framleiðsluvinna og umsitingarligar tænastuveitingar, minkingin er 0,9 prosent í báðum bólkum. 

12,4 milliardir krónur vóru latnar í A-skattaðum lønum frá juli í fjør til juni í ár. 

Tað eru slakar 700 milliónir meira samanborið við undanfarna tíðarskeið, sum var frá juli í 2022 til juni í 2023.

Vøksturin er 5,8 prosent.