Nýtt samband: Skulu hava víðkaðar heimildir á uttanríkispolitiska økinum

Føroyar skulu hava víðkaðar heimildir á uttanríkispolitiska økinum. Men grundlógin, gjaldoyrað, kongshúsið, rættarskipanin, politiið, ákæruvaldið og kriminalforsorgin skulu enn vera donsk málsøkir, meðan uttanríkispolitikkurin skal partvíst vera danskur.

Tað sigur Sambandsflokkurin, sum undir yvirskriftini "Nýtt samband - Eitt sjálvstýrandi land í ríkinum", bjóðaði til tíðindafund fyrrapartin.   

Sambandsflokkurin skjýtur upp, at uttanríkispolitiska rásarúmið verður víðkað og lagt í fastar karmar. 

Allur tíðindafundurin kann síggjast og hoyrast á Facebook-vanganum hjá Sambandsflokkinum. 

Tvær uttanríkispolitiskar súlur

Uttanríkispolitikkur skal liggja í tveimum súlum, sum skulu staðfestast við lóg, nevniligia ein, ið bert viðvíkir Føroyum, og ein sum er felags fyri alt ríkið.

Undir tí súluni, sum bert er fyri Føroyar, eru altjóða og millumtjóða felagsskapir, fiskiveiðuavtalur og handilsavtalur. Somuleiðis eiga vit at hava avgerðarrætt viðkjandi verjupolitiskum átøkum á okkara leiðum.

Í sambandi við víðkaðu heimildirnar á uttanríkispolitiska økinum, skal tingskipanin ella stýrisskipanin broytast. 

Bárður á Steig Nielsen er formaður í Sambandsflokkinum.