Nógv rok um einki: Rúsevni vístu seg at vera sandur

Tað var sandur og ikki rúsevnir, sum vóru umborð á skjóttgangandi bátinum, sum varð tikin við eitt eftirlit í íslendska býnum Høfn í Hornafirði fyrradagin. Tað skrivar íslendska kringvarpið á heimasíðu síni.

Tá báturin, sum hevði verið inni í Føroyum á leiðini til Íslands, legði at í Høfn fyrradagin komu tollarar umborð og teir fingu illgruna til tveir pakkar, sum vigaðu um 100 kilo tilsamans.

Nógv varð gjørt burturúr, tí umframt at menninir báðir, sum vóru við bátinum, vóru handtiknir, helt løgreglan vakt við bátin alla fríggjanáttina og tyrla fleyg eisini yvir økinum ein part av tíðini.

Málið var eisini nevnt í øllum íslendskum miðlum í gjár, men tað skuldi vísa seg at vera púra óneyðugt. Tí tá til stykkis kom var tað bara sandur, sum var í pakkunum, sum løgreglan fór avstað við. Tað skrivar RUV á heimasíðu síni seinnapartin í gjár.

Íslendsku miðlarnir gjørdu nokkso fitt burturúr, at báturin kom úr Føroyum til Íslands, og tað sæst eisini á heimasíðuni Marine Traffic. Báturin var á Vestmanna áðrenn hann legði leiðina til Íslands, men talan er um ein skjóttgangandi bát, sum gongur umleið 30 míl um tíman, og sum er skrásettur í Svøríki. Báturin hevur eftir øllum at døma tætt samband við Ísland, tí hann eitur Ormurinn Langi, stavað við íslendska stavingarmátanum við tveimum n-um í fyrra navninum.

Menninir báðir, sum vórðu handtiknir, tá báturin kom til Íslands, vórðu leyslætnir seinnapartin í gjár.