Russland flytur fólk úr enn einum øki nærhendis ukrainska markinum

Russisku myndugleikarnir hava í dag flutt fólk burtur í Belgorod-økinum. Orsøkin er, at ukrainsku herdeildir eru í økinum.

Tað sigur guvernørurin í økinum, Vyacheslav Gladkov, í einum uppslagi á sosiala miðlinum Telegram.

- Eg eri vísur í, at okkara hermenn fara at gera alt fyri at basa hóttanini, ið er íkomin.

- Vit eru farin undir at flyta fólkini, sum búgva í Krasnaya Yaruga-økinum, til tryggari støð, skrivar Gladkov, sambært Reuters.

Á middegi í dag vóru 11.000 fólk flutt burtur, upplýsir almenna russiska tíðindastovan, Tass.

Býurin Belgorod liggur í Russlandi og liggur nær við markið til Ukraina.

Eisini í landslutinum Kursk eru nógv fólk flutt burtur. Hiðani eru umleið 121.000 fólk flutt burtur, sigur guvernørurin í Kursk, Aleksej Smirnov, sambært AFP.

Burturflutningurin av fólki í Kursk byrjaði í síðstu viku, eftir at ukrainskar herdeildir tóku seg um markið til Russlands.

Sambært guvernørinum í Kursk, so eru 28 bygdir í økinum undir ræði hjá ukrainsku herdeildunum. Hann upplýsir víðari, at ukrainsk álop á Kursk hava kostað 12 fólkum lívið og sært 121, skrivar Tass.

Ukrainska álopið, sum er í gongd, er størsta samskipaða álopið á russiskt øki hjá egnum herdeildum hjá Ukraina higartil.

Sunnukvøldið vóru ukrainsku herdeildirnar komnar umleið 30 kilometrar inn í russiskt øki, upplýsir Russland.

Russiska verjumálaráðið upplýsti í hesum sambandi, sambært BBC, at russiskar herdeildir høvdu lopið á ukrainskar hermenn nærindis býunum Tolpino og Obstjy Kolodez.

Um vikuskiftið setti Russland í verk tað, sum tað kallar "anti-terror" tiltøk í Kursk, Belgorod og Bryansk. Øll trý økini hava mark til Ukraina.

Orsøkin var eisini ukrainska rørslan tvørtur um markið.

Við tiltøkunum hava myndugleikarnir millum annað loyvi til at flyta íbúgvar í økjunum og avlurta telefonir hjá borgarum.

/ritzau/