- Tíðindi, mentan og ítróttur
Skúlastýrisval verður eisini 12. november
![](https://kvf.fo/sites/default/files/styles/grein-ovasta-mynd/public/undirvisingarstyrid_filename_number_suffix.jpg?itok=CgeYsyQU)
12. november verður skúlastýrisval, og síðst í oktober skulu listarnir við valevnum til skúlastýrini vera lidnir.
Annan týsdag í november er ikki bara kommunuval á skránni. Val til skúlastýrini í teimum 40 fólkaskúlunum í landinum skal eisini avgreiðast henda dagin.
- Undirvísingarstýrið ger kunningartilfar til skúlarnar um skúlastýrisvalið. Kunningartilfarið er faldari ætlaður foreldrum, og í faldaranum verður valið lýst og annars uppgávur, skyldur og rættindi, sum eitt skúlastýri hevur, sigur Vagn Foldbo, deildarleiðari í Undirvísingarstýrinum.
Heim og skúli
Tá ið skúlastýrisvalið er avgreitt í november, fer Janus Vang, formaður í Foreldrafelagnum Heimi og skúla, at hava upplegg fyri nývaldu skúlastýrislimunum á aðalfundinum hjá Heimi og skúla um, hvat tað vil siga at sita í skúlastýri.
Reglur um skúlastýri eru ásettar í fólkaskúlalógini.
Uppgávurnar hjá skúlastýrinum eru millum annað at hava eftirlit við virksemi skúlans og taka avgerð um øll viðurskifti skúlanum viðvíkjandi, ið ikki eru løgd undir kommunustýrið.