Telva fyri besta OL-úrslitinum

Føroyar eru flúgvandi á talvolympiaduni í Ungarn. Í gjár vunnu føroyska landsliðið 2½ - 1½ á Avstralia, sum er styrkismett væl ovari enn Føroyar. Eitt einastandandi úrslit - helst ein av bestu einstøku dystum hjá Føroyum á nakrari talvolympiadu, skrivar Talvsamband Føroyar.

18 ára gamli føroyameistarin Luitjen vann á fjórða borði. Hinir tríggir telvaðu javnt - Helgi Dam Ziska, Høgni Egilstoft Nielsen og Rógvi Egilstoft. Høgni Egilstoft Nielsen hevur tryggjað sær heitið sum altjóða meistari á hesari olympiaduni, og hjá unga føroyameistaranum hevur eisini gingist sera væl. So væl, at Luitjen Akselsson Apol telvar fyri sínum fyrsta IM-normi í dag.

Føroyar hava nú 13 stig fyri tíggju dystir. Seks sigrar, ein javnleik og trý tap eru úrslitini higartil. Síðani tað í 2008 var farið yvir at lata dystarstigini telja á talvolympiadum heldur enn borðstigini sum fyrr, er úrtøkan í Budapest tann higartil besta hjá okkum.

Føroyar hava svingað seg heilt fram á 35 pláss í røðini av 188 londum í kappingini. Vit liggja javnir við Norra, men eru frammanfyri hini norðurlondini. Okkara menn telva tí í løtuni fyri sínum besta OL-úrsliti nakrantíð.

Krútsterk mótstøða

Dysturin í dag er eftir. 11. og síðsta umfar byrjaði klokkan 10 fyrrapartin. Nú vit hava otað okkum so langt fram slept ikki undan harðari mótstøðu í síðsta dystinum. Vit telva móti Kekkia, sum er styrkismett nummar 19 í kappingini. Kekkiska liðið hevur eitt miðalstrykital, sum er omanfyri 2600. 

Vit hava telvað tvær ferðir móti Kekkia. Báðir dystir endaðu 3-1 til Kekkia - tað var hildið at vera heiðurligt úrslit hjá okkum. Í Istanbul í 2000 vann John Rødgaard eitt flott talv á Pavel Blatny, sum tá hevði 2590 í rating. Tað var á øðrum borði; John Arni Nilssen telvaði tá fyrstu ferðina á 1. borði. Í Bled í 2002 eydnaðist John Rødgaard og Heina Olsen á øðrum og triðja borði at telva javnt móti ávikavist Babula og Haba, sum í miðal lógu um 2550 í rating. 

Kekkia er sterk talvtjóð. Nøvn sum Pachman og Hort eru víðakend. Í 1982 endaðu kekkar - tá var tað gamaní Kekkoslovakia - nummar tvey í talv-OL. Sterkasti telvari í kekkia seinnu árini hevur verið David Navara. Hann var eitt skifti nummar trettan í heiminum. Hann hevur Helgi Dam Ziska ímóti sær í dag. Telvararnir á fremru borðunum hjá Kekkia í dag eru báðir í topp 100 í heiminum, skrivar Talvsambandið.