Samkoma fær ólógligan stuðul frá kommunu

Tórshavnar kommuna letur einari átrúnaðarligari samkomu ólógligan fíggjarligan stuðul, um kommunan ikki tryggjar sær og kunnar um, at øll kunnu brúka parkeringsbásarnar við samkomuhúsið við Vegin langa, og ikki bara tey, sum eru í samkomuni.

Tað er niðurstøðan hjá Kommunala eftirlitinum.

Kommunala eftirlitið biður Tórshavnar kommunu um innan tveir mánaðir at upplýsa, hvat hon ger við málið.

Kommunala eftirlitið fekk 21. august í fjør fyrispurning frá tíðindamiðli um, at Tórshavnar kommuna brúkti slaka millión krónur til eitt útiøki hjá samkomu í Hoyvík.