Avtala við stórar kommunur tryggjar øllum bókasavnstænastur

Sirið Stenberg, landsstýriskvinna í mentamálum, Heðin Mortensen, borgarstjóri í Tórshavnar kommunu, Karl H. Johansen, borgarstjóri í Klaksvíkar kommunu, og Tórbjørn Jacobsen, borgarstjóri í Runavíkar kommunu, hava gjørt avtalu um, at tær tríggjar kommunurnar skulu veita hinum kommununum fólkabókasavnstænastur. 

Avtalan tryggjar, at øll fólk fáa atgongd til fólkabókasavnstænastur, sambært nýggju bókasavnslógini.

Tænasturnar fevna eitt nú um bókasavnsraktsur, bókasavnsskipanir, skráseting, innkeyp, kassatión, klassifikatión, leiting, vegleiðing, meting av tilfari og keldum og miðlan av bókmentaligum tilfari.

Tænasturnar fevna eisini um at læna bøkur og annað til far út í avmarkað tíðarskeið, ella at skipa fyri tiltøkum.

Einki gjald krevjast

Einki gjald skal krevjast fyri hesar tænastur, stendur í avtaluni.

Landið letur tvær milliónir krónur til at skipa samstarv millum kommunur um fólkabókasavnstænastur. Kommunurnar fáa 670.000 krónur í part fyri í ár.

Stuðulin verður latin Tórshavnar kommunu,  Klaksvíkar kommunu og Runavíkar kommunu afturfyri at kommunurnar gera avtalu við hinar kommunurnar í landinum um fólkabókasavnstænastu.

Avtalurnar við hinar kommunurnar verða gjørdar í næstum.