Liam Payne úr One Direction deyður

Liam Payne, fyrrverandi sangari í kenda tónleikabólkinum One Direction, doyði í gjár bara 31 ára gamal.

Hann doyði av fallinum, tá hann datt av triðju hædd á einum gistingarhúsi í Palermo, sum er ein forstaður til Buenos Aires.

Tað váttar løgreglan í argentinska býnum sambært bretska miðlinum The Guardian.

Doyði á staðnum

Ein talsmaður hjá heilsutænastuni í býnum sigur, at enski sangarin datt tríggjar hæddir niður og endaði í einum innandura urtagarði á gistingarhúsinum.

Sjúkrabilar komu til gistingarhúsið nakrar fáar minuttir eftir fráboðanina, men har var einki at gera, tí maðurin var deyður á staðnum.

Sum skilst eru myndugleikarnir í ferð við at kanna málið og at líkskoðan skal gerast, tí illgruni er um at sangarin var ávirkaður av rúsevnum.

X Factor slóðaði vegin

Liam Payne gjørdist heimskendur, tá hann royndi seg í enska X Factor.

Fyrstu ferð var í 2008, og síðani í 2010. Hann kom ikki serliga langt sum solistur, men tá hann í 2010 bleiv bólkaður saman við Harry Styles, Louis Tomlinson, Niall Horan og Zayn Malik í One Direction, ja, so var nærmast einki mark fyri, hvussu væl umtóktir teir blivu. 

Liam Payne, ið skrivaði fleiri av hittunum hjá One Driection, eitt nú "Story Of My Life", og hevur verið bæði tónleikaframleiðari og staðið á egnum beinum tónlistarliga, síðani One Direction gavst í 2016.