Uppskot um misálit lagt fram

Formenninir teimum trimum andstøðuflokkunum hava fyri løtu síðani lagt fram uppskot um misálit á Ingilín D. Strøm, landsstýriskvinnu.

Reglurnar siga, at í slíkum førum mugu onnur mál víkja, og uppskotið um misálit viðgerast beinan vegin.

Bárður á Steig Nelsen, Beinir Johannesen og Jenis av Rana siga soleiðis í viðmerkingunum til uppskotið:

"Vísandi til fyribilsniðurstøðuna, ið ein samd Landsstýrismálanevnd sendi landsstýriskvinnuni í umhvørvismálum í málinum um, at landsstýriskvinnan hevði sagt ósatt fyri Løgtinginum, verður lagt fram misálit á Ingilín D. Strøm, landsstýriskvinnu.

Ein samd nevnd staðfesti greitt í fyribilsniðurstøðuni, at landsstýriskvinnan hevur sagt ósatt fyri Løgtinginum, og sendi niðurstøðuna til hoyringar hjá landsstýriskvinnuni. Landsstýriskvinnan svarar aftur við at máa undan trúvirðinum hjá eftirlitsstovnum Løgtingsins, ið eru ein av grundsúlunum undir okkara fólkaræði."

Ingilín D. Strøm og misálit

Myndir: Bjarni Árting Rubeksen

Ingilín D. Strøm og misálit

Les uppskotið her.

Bjørt Samuelsen, løgtingsforkvinna, hevur niðurlagt tingfundin, so tingfólk fáa høvi at lesa uppskotið, og tingfundurin verður tikin uppaftur klokkan 11.45.

Tá kemur uppskotið um misálit til viðgerðar. 

Fylg við tingfundinum her.