Kommunulækni ósamd við Landslæknan um Giljagarð

- Eg dugi ikki at síggja, at borgarirnir á Giljagarði upp á nakran sum helst máta eru í vanda.

Tað sigur Jytta Friang, kommunulækni á eldrasambýlinum Giljagarði í Leirvík.

Giljagarður hevur fingið átalu frá Landslæknanum í sambandi við trygdina hjá búfólkunum. Giljagarður sigur í hoyringarsvari, at hond er tikin um viðurskifti í átaluni síðani eftirlitið tann 21. august. Men sambært frágreiðingini er tað ikki nokk til, at Landslæknin vil strika átaluna.

Sambært átaluni frá Landslæknanum skulu broytingar gerast í sambandi við handfaring av heilivági, dagføring av journalum, sjúkrarøktarligum metingum og samtykki um kunning.

Ein atfinning av Giljagarði var eisini, at leiðbeiningin um at frávelja lívsleingjandi viðgerð ikki var nøktandi. Men broytingar eru framdar á hesum øki, og Landslæknin hevur góðkent broytingarnar.

- Samanumtikið eru stórir trupulleikar við trygdini, sum er til vanda fyri sjúklingarnar, sigur landslæknaembætið.

Men hesari meting er Jytta Friang als ikki samd við.

Hoyr innslagið við Jyttu Frinag, sum varð sent í tíðindunum kl 18.00, her: