Málstovan stongd restina av árinum

Mentamálaráðið fer á fund við fíggjarnevndina í morgin at viðgera støðuna hjá Málstovuni, sum restina av árinum ikki kann veita ráðgeving, tí arbeiðsbyrðan er so stór í løtuni.

Tá ringt verður til Málráðið, fært tú at vita, at orsakað av vantandi arbeiðsmegi og fíggjarorku svarar Málstovan ikki málspurningin fyrr enn í januar 2025.

- Støðan er ørkymlandi, sigur Randi Kúrberg, umsjónarfólk á skrivstovuni hjá Málráðnum.

Málstovan veitir málsliga ráðgeving og svarar málspurningum, og tekur sær eisini av at viðlíkahalda og dagføra stavsetingarorðabókina.

Hálvtannað starvsfólk er sett til at røka hetta arbeiðið, og tí er Málráðið serliga viðbrekið viðvíkjandi manning.

Hoyr innslag í útvarpstíðindunum: