G! festivalurin: Heimskendi íslendski rokkbólkurin Kaleo verður høvuðsnavn

"Way Down We Go". Heimskendi íslendski rokkbólkurin Kaleo verður eitt av høvuðsnøvnunum á G! festivalinum í summar

Mynd: Kaleo á Facebook

28.11.2024 - 12:32

Í 2014 vitjaði eitt ókent íslendskt rokkorkestur Føroyar og G! festivalin, tá teir spældu á spæliplássinum í Syðrugøtu.

Kaleo var fyrstu ferð komið inn á radaran hjá tónleikaáhugaðu føroyingum fyrri sama ár, tá bólkurin spældi á føroyska Frigg festivalinum, sum bleiv fyriskipaður í Keypmannahavn.

Tað var eingin onnur, enn tann seinni so navnframa Barbara Holm, journalistur og redaktør í Frihedsbrevet.fo, ið bókaði tónleikin til festivalin, og sum hevði fingið eyga á lovandi íslendska rokkbólkin.

Á G!

Síðani hevur tað bara gingið ein veg hjá Kaleo: Yvir fýra milliardir stroymingar, GRAMMY-tilnevning, konsertir saman við Rolling Stones og framførslur á risafestivalunum Coachella og Lollapalooza.

So nú G! festivalurin boðar frá, at Kaleo kemur aftur til Føroya at spæla á festivalinum í 2025, eru Jökull Júlíusson (JJ), Davíð Antonsson, Daníel Kristjánsson, Rubin Pollock og Þorleifur Gaukur Davíðsson heimsstjørnur.

"Way Down We Go"

Alt broyttist fyri Kaleo, tá bólkurin í 2016 útgav plátuna A/B við risahittinum "Way Down We Go".

Sangurin hevur í dag 1,2 milliardir spælingar á Spotify.