Sigvald Zachariasen: - Nýggja brúgvin eitt stórt framstig

Um vikuskiftið læt nýggja brúgvin millum Hvalvík og Streymnes upp. Brúgvin um Stórá er staðsett har tvær aðrar brýr áður hava staðið. Tann fyrsta var bygd síðst í 1920'unum, og onnur miðskeiðis í 50'unum. Hetta veit Sunda kommuna at siga.

Sigvald Zachariasen, sum býr í Streymnesi, sigur, at tey lokalu fegnast um nýggju brúnna um Stóra. Hon ger sítt til at samansjóða Hvalvík og Streymnes. Í gomlum døgum vóru bygdirnar púra hvør sítt, men soleiðis hugsa fólk ikki longur, sigur Sigvald við einum brosi.

Arbeiðið at gera brúnna var av fyrstan tíð boðið út í 2023. Tá valdi Sunda kommuna at bjóða arbeiðið út av nýggjum, tí bara eitt tilboð kom inn. Síðani var arbeiðið boðið út av nýggjum í mars í ár, og tá komu fýra tilboð. Broytingar vóru eisini gjørdar í nýggja útboðnum.

Nú nýggja brúgvin um Stórá er tikin í nýtslu, er hon 22 metrar long og 6,5 metrar breið.

Sambært Sunda kommunu er hædd tikin fyri ferðslutrygd og ábærari ferðslu við nýggju brúnni, samstundis sum hon er bygd til tunga ferðslu.

Tað er fyritøkan Malltek, sum hevur gjørt nýggju brúnna. Arbeiðið byrjaði í juni í ár.