Kommunustjóri í Havn: Lønarlyftið orsøk til hækking í ansingargjaldinum

Gjaldið hjá foreldrunum í Tórshavnar kommunu hækkar næsta ár millum 220 krónur og 377 krónur um mánaðin, alt eftir um talan er um vøggustovu ella barnagarð.

Talan er um  eina 10 prosent hækking í ansingargjaldinum.

Foreldragjaldið verður dagført næstan hvørt ár í samband við fíggjarætlanina, sigur Jóan Petur Hentze, kommunustjóri. 

- Tað er serliga lønarlyftið sum ger, at gjaldið verður høgt næsta ár. 

Lønarlyftið hjá Pedagogfelagnum, Heilsuhjálparafelagnum og Heilsurøktarafelagnum kostar Tórshavnar kommunu 13,8 milliónir krónur í ár, vísir Jóan Petur Hentze á. 

Gjalda fyri yngsta barnið

Vøggustovugjaldið, sum fevnir um børn frá 0 til 2 ár, hækkar frá 3.642 krónum um mánaðin upp í 4.019 krónur um mánaðin.

Barnagarðsgjaldið, sum fevnir um tey 3 til 7 ára gomlu børnini, fer frá 2.227 krónum upp í 2.447 krónur um mánaðin.

Foreldur rinda bara fyri eitt barn á dagstovni. Hava foreldur fleiri børn í ansing, rinda tey bara fyri yngsta barnið.

Dagstovnagjaldið í Tórshavnar kommunu er 11 mánaðir. Goldið verður ikki fyri august mánað.

Jóan Petur Hentze