Justin Trudeau fer frá sum kanadiskur forsætisráðharri

Justin Trudeau fer frá sum floksformaður í liberala flokkinum í Kanada, og hann fer eisini frá sum kanadiskur forsætismálaráðharri, tá ið nýggjur floksformaður er valdur.

Tað boðaði kanadiski forsætisráðharrin frá á tíðindafundi í Ottawa seinnapartin.

Justin Trudeau verður sitandi sum forsætisráðharri, til nýggjur formaður er valdur. Men hann hevur heitt á generalguvernørin í Kanada um at steðga tingarbeiðnum til tann 24. mars, so at liberali flokkurin fær stundir at velja hansara avloysara.

Verið undir trýsti í langa tíð

Justin Trudeau hevur í longri tíð verið undir trýsti frá floksfelagum og vánaligum meiningakanningum. 

Í september yvirlivdi hann eitt uppskot frá kanadisku andstøðuni um misálit, og í desember fór fíggjarmálaráðharrin Chrystia Freeland frá.

Ósemja var millum hana og forsætisráðharran um fíggjarmál, og tey vóru eisini ósamd um, hvussu ávísar handilshóttanir frá Donald Trump skulu handfarast; komandi forsetin í USA ætlar at áseta 25 prosent í tolli á allar kanadiskar vørur.

Val verður til kanadiska tjóðartingið í oktober.

Justin Trudeau hevur verið forsætisráðharri í Kanada síðan 2015.