Landsstýrið má gera greitt, hvat grundstykki kunnu seljast fyri

Formaðurin í Kommunufelagnum sigur, at niðurstøðan hjá Kommunala eftirlitinum er stórt inntriv í hundrað ára gamla siðvenju

Tórbjørn Jacobsen, borgarstjóri og formaður í Kommunufelagnum.

Mynd: Bjarni Árting Rubeksen

Jón Brian Hvidtfeldt

08.01.2025 - 13:42

- Landsstýrið má gera púra greitt, um grundstykki skulu seljast fyri kostprís ella ikki.

Tað sigur formaðurin í Kommunufelagnum.

Torbjørn Jacobsen heldur málið vera so mikið prinsipielt, at tað rakar beint inn í allan bústaðarpolitikkin.

12.desember kom Kommunala eftirlitið til ta niðurstøðu, at ein kommuna skal selja grundstykki fyri kostprís.

Stórt inntriv

Niðurstøðan byggir á eitt mál í Kollafirði, har Tórshavnar kommuna vildi selja kommunalu grundstykkini fyri 500.000 krónur, hóast metti kostprísurin var 780.000 krónur.

Tað kann ein kommuna ikki, sigur eftirlitið, sum liggur undir Løgmálaráðnum.

Ein slík niðurstøða er so mikið stórt inntriv í hundrað ára gamla siðvenju, at landsstýrið má gera púra greitt, hvat er galdandi, sigur Tórbjørn Jacobsen, borgarstjóri og formaður í Kommunufelagnum.

Hoyr innslag í útvarpstíðindunum:

08012025_Tobbi_og_grundstykkjaprisur