Tíggju ára gomul træta um WTO skal loysast nú

Aksel V. Johannesen, løgmaður, og Mette Frederiksen, forsætisráðharri, hava fyrrapartin skrivað undir felags áheitan á Hægstarætt um formliga at seta sokallaðu grein 6-nevndina í heimastýrislógini at loysa ósemjuna millum danskar og føroyskar myndugleikar um sjálvstøðugan føroyskan limaskap í heimshandilsfelagsskapinum.

- Trætan hevur verið í tíggju ár, og hon skuldi helst verið loyst politiskt, sigur løgmaður. 

Sí videobrot frá undirskrivingini her:

Arbeitt síðani í summar

Løgmansskrivstovan og forsætismálaráðið hava síðani í summar arbeitt við at fyrireika, hvussu nevndin skal mannast, og hvussu hon skal virka, og nú er so skrivað undir felags áheitan á Hægstarætt um formliga at seta nevndina.

Nevndin skal taka støðu til spurningin: Er limaskapur Føroya í egnum navni í World Trade Organization, WTO, sambæriligur við stjórnarskipanarligu støðu Føroya?

Føroyar hava leingi viljað fingið sjálvstøðugan limaskap í WTO, men løgfrøðingar í danska løgmálaráðnum hava sagt, at slíkur limaskapur er í stríði við grundlógina.

Føroyskur limaskapur hevur stóran týdning fyri føroyskan útflutning og fyri møguleikan at gera fríhandilsavtalur við onnur lond. 

WTO og Aksel V. Johannesen og Mette Frederiksen

WTO og Aksel V. Johannesen og Mette Frederiksen

(Myndir: Ritzau Scanpix)

164 limalond

Samanlagt hava 164 lond limaskap í heimshandilsfelagsskapinum, WTO, sum er ein millumtjóða felagsskapur,  sum var stovnaður í 1995.

Í sambandi við ríkisfundin í Aalborg seinasta summar samdust løgmaður og danski forsætisráðharrin um, at spurningurin um føroyskan WTO-limaskap skuldi roynast í einari serligari nevnd, sambært grein 6 í heimastýrislógini.

Hetta var gjørt, eftir at landsstýrið hevði fingið undirtøku frá einari samdari uttanlandsnevnd

Landsstýrið og danska stjórnin hava, hvør í sínum lagi, valt tvey umboð í nevndina. Í næstum verður kunngjørt, hvørji umboðini í nevndini eru.

Hoyr samrøðu, sum Hallur av Rana gjørdi við Aksel V. Johannesen, løgmann, í útvarpstíðindunum: 

Sjónvarpið hevur eyka tíðindasending klokkan 15 um ríkisfundin. Sendingin verður eisini stroymd á netinum.