Hondbóltur, fimleikur ella svimjing fær Ítróttastjørnuskotið 2024

Hondbóltsúrmælingurin á A-landsliðnum hjá kvinnum Maria Pálsdóttir Nólsoy, ungi og evnaríki svimjarin Líggjas Joensen og stórtalentið innan amboðsfimleik Mia Højgaard úr Havnar Fimleikafelag eru í uppskoti til ítróttastjørnuskotið 2024.

Heiðurin verður latin ungum ítróttafólki ella liði, sum hevur skarað framúr farna árið, og tað er Ítróttasamband Føroya, sum letur heiðurin á Ítróttafagnaðinum í Løkshøll 1. februar. 

Maria Pálsdóttir Nólsoy

Ungi hondbóltsúrmælingurin er farin úr Neistanum til HH Elite í bestu donsku hondbóltsdeildini, har hon hevur spælt væl í heyst. Tey flestu kenna helst 20 ára gamla bakspælaran frá føroyska hondbóltslandsliðnum, har hon hevur havt týðandi leiklut - bæði í undankappingini - og í sjálvum endaspælinum í Sveis í vetur, har tað eydnaðist at spæla søguligan javnleik ímóti Kroatia, skrivar ÍSF millum annað um Mariu Pálsdóttir Nólsoy.

Líggjas Joensen

Blaðungi svimjarin skifti í summar Ægir út við Aalborg Svømmeklub, har hann nú venur miðvíst undir góðum umstøðum. Hóast hann bert er 16 ára gamal hevur hann longu gjørt vart við seg. Farna árið hevur vunnið eitt ótal av heiðursmerkjum í norðurlendskum kappingunum Danish Open, NMU og NJM, og harumframt luttók svimjarin eisini í tveimum heimsmeistarakappingum, stendur í gundgevingunum frá ÍSF.

Mia Højgaard

Mia Højgaard út Havnar Fimleikafelag er ein óvanliga góður amboðsfimleikari. Bert 15 ára gomul hevur hon prógvað, at hon telist millum bestu íðkararnar í kongaríkinum. Hon hevur millum annað vunnið DM fyri lið og fleiri gull í DM fyri juniorar. Hon var eisini við á danska landsliðnum, sum kappaðist um EM. Vert er at leggja til merkis, at Mia Højgaard er sera fjøltáttað og stinn innan øll fýra amboðini hjá kvinnunum, skrivar ÍSF.

Ítróttafagnaðurin 2024 verður vístur beinleiðis í sjónvarpinum hjá Kringvarpinum.