Føroya Banki væntar aftur at hava 300 milliónir í avlopi

Føroya Banki væntar, at úrslitið fyri 2024 verður oman fyri 300 milliónir krónur. 

Tað hevur bankin boðað keypsskálanum frá.

Mett verður, at úrslitið fer at liggja millum 302 og 312 milliónir krónur. 

Tað er nakað meira enn mett, tá ið roknskapurin fyri 2023 var kunngjørdur í februar í fjør. 

Tá var sagt, at úrslitið fór at vera millum 250 og 280 milliónir.

Tað eru serliga íløgur í virðisbrøv, sum hava roynst betur enn væntað, og so hava niðurskrivingar av virðum verið minni, enn roknað var við

Føroya Banki væntar tí, at úrslitið fyri 2024 verður áleið tað sama sum í 2023, tá bankin hevði 308 milliónir krónur í avlopi eftir skatt.