Tríggir danir tiknir fyri at fyrireika rúsevnissmugling til Føroya

Tríggir danskir menn, 39, 41 og 46 ár, eru tiknir í Danmark fyri at leggja til rættis smugling til Føroya.

Tveir vóru tiknir í gjár.

Teir eru skuldsettir fyri at hava lagt til rættis, at 22 kilo av hassji og fýra kilo av amfetamini vóru smuglað til Føroya við seglbáti úr Danmark í fjør summar.

Rúsevnini skuldu, sambært skuldsetingini, seljast í Føroyum.

Tiknu menninir eru í skipaða kriminella umhvørvinum í Danmark.

nsk1.jpg

NSK arbeiddi saman við politinum

NSK, sum er stytting fyri National Enhed for Særlig Kriminalitet, og politiið í Føroyum arbeiddu saman um handtøkurnar. 

Politiið í Eysturjútlandi og á Fjóni hava hjálpt til í handtøkuatsóknini og í rannsóknunum, sum vóru í gjár.

Samstarv er eisini við TAKS og Skattestyrelsen í Danmark.

Menninir, sum vóru tiknir í gjár, eru í løtuni í grundlógaravhoyring í Aarhus. Ákæruvaldið bað um afturlatnar hurðar.

Fimm fólk tikin í Føroyum

Politiið í Føroyum tók í august í fjør fimm fólk í sambandi við sama mál.

Fýra teirra eru enn í varðhaldi.

Málið verður viðgjørt í Føroya rætti fyrstu viku í mars.

Teir, sum nú eru tiknir, eru bakmenninir, sigur Michael Kjeldgaard, leiðandi politiinspektørur í NSK.