Kirkjugarðsvígsla í Leirvík

Í morgin klokkan 12.30 verður kirkjugarðsvígsla í Leirvík, har tey hava víðkað kirkjugarðin norðureftir.

Kirkjugarðurin varð eisini víðkaður mitt í 80-unum, men við millum 10 og 12 nýggjum gravum um árið var nú aftur neyðugt við eini víðkan.

Í fyrsta umfari eru umleið 340 nýggj gravpláss fingin, men seinni ber til at víðka garðin niðaneftir og fáa onnur 300 gravpláss aftrat.

Felags um vígslu
Tað eru Eysturkommuna, Leirvíkar kirkja og Hebron, ið skipa fyri kirkjugarðsvígsluni, ið byrjar við, at sungin verður ein sálmur, meðan gingið verður rundan um nýggja økið.

Síðani lesa Gerhard Jónsson Mikkelsen, prestur, og Jóan Magnus Rasmussen frá samkomuni Hebron tekstbrot úr bíbliuni,.

Síðani verður biðin ein bøn og so verður sjálv vígslan, áðrenn endað verður við einum sálmi.