- Tíðindi, mentan og ítróttur
Ákærdur fyri at smugla tilfar til at gera rúsevni

27. og 28. februar verður rættarfundur um ein mann, sum er ákærdur fyri at smugla 7,2 litrar av evninum 5F-MDMB-PINACA, sum verður brúkt til at gera rúsevni.
Sambært ákæruritinum kunnu teir 7,2 litrarnir, sum vóru í sodavatnsblikkum, brúkast til at gera 21 kilo og 191 gramm av MDMA ella fýra kilo og 450 gramm av kokaini ella 18 kilo og 179 gramm av amfetamini.
Maðurin valdi í gjár sjálvboðin at vera í varðhaldinum, til Føroya rættur hevur dømt í málinum. Hann hevur verið í varðhaldi síðani hálvan juli í fjør.
Tikin á flogvøllinum
Hann er eisini ákærdur fyri hvítvask.
Maðurin var tikin á flogvøllinum 23. februar í fjør, tá hann skuldi til Keypmannahavnar. Hann hevði 35.000 kr. við sær.
Politiið sigur, at pengarnir stava beinleiðis ella óbeinleiðis frá ólógligum virksemi.
Maðurin noktar seg sekan.
