Fyrsti kvinnuligi forsætisráðharrin í Liktinstein

Fyri fyrstu ferð verður forsætisráðharrin í Liktinstein ein kvinna.

Tað skrivar týska tíðindastovan dpa.

Val var í Liktinstein í gjár, og har bleiv konservativi flokkurin VU størsti flokkur við 38,3 prosentum av atkvøðunum. Næststørstur er progressivi flokkurin FBP, sum fekk 27,5 prosent.

Brigitte Haas er forkvinna í VU,  og tekur sambært dpa við sum stjórnarleiðari 20. mars.

Kvinnur í Liktinstein fingu ikki valrætt fyrr enn í 1984. Tað fingu tær á eini fólkaatkvøðu, har bara menn sluppu at atkvøða. Úrslitið í prosentum var 51-49 fyri, at kvinnur skuldu fáa valrætt.

Sostatt var Liktinstein seinasta landið í Evropa, sum gav kvinnum valrætt.

Í Liktinstein er tað tó framvegis fúrstin, sum hevur størsta valdið. Hann kann koyra stjórnina frá, og hevur eisini sýtingarrætt til at steðga lógaruppskotum at koma fyri tingið.