Uppskot um at keypa Grønland lagt fyri umboðsmannatingið

Eitt uppskot um at keypa Grønland er lagt fyri amerikanska umboðsmannatingið.

Republikanarin Earl "Buddy" Carter hevur skotið upp at heimila Donald Trump, forseta, at keypa Grønland, og at geva oynni navnið: Reytt-, Hvítt- og Bláland, skrivar Ritzau sambært grønlendska kringvarpinum, KNR.

Nógv uppskot verða løgd fyri umboðsmannatingið, men ikki øll vinna frama.

Óvissa um undirtøkuna

Ógreitt er eisini, hvussu stór undirtøka er fyri hesum uppskotinum í umboðsmannatinginum. 

Fyrstu ferð, Donald Trump nevndi møguleikan at keypa Grønland, var, tá hann var forseti í 2019. 

Grønlendski landsstýrisformaðurin, Múte B. Egede, og Mette Frederiksen, forsætisráðharri, hava víst ætlanini hjá amerikanska forsetanum aftur. 

Ted Cruz

Ted Cruz, senatorur. (Mynd: NBC News)

Hoyring í senatinum 

Grønland verður eisini á breddanum í eini hoyring í amerikanska senatinum seinnapartin í dag, okkara tíð.

Republikanski senatorurin, Ted Cruz, sigur, at hann væntar, at hoyringin fer at vísa, hvussu stóran geopolitiskan týdning Grønland hevur, og hví USA hevur so stóran áhuga fyri Grønlandi. 

- Náttúruríkidømið í landinum fer at styrkja amerikansku veitingarketurnar og ídnaðin, sigur hann.