Trump: Zelenskyj fer at skriva undir avtalu um ráevni í Ukraina

Amerikanski forsetin, Donald Trump, væntar, at Volodymyr Zelenskyj kemur til USA í hesi vikuni ella næstu viku at skriva undir avtalu um mineral og sjáldsom ráevni í ukrainsku undirgrundini.

Tað segði Trump, tá hann helt felags tíðindafund saman við franska forsetanum, Emmanuel Macron, í ovala rúminum í Hvítu húsunum í gjár.

Síðstu tíðina hevur ukrainska undirgrundin verið í brennideplinum.

Óváttað tíðindi ganga um, at stjórnin hjá Donald Trump, forseta, fer at krevja eitt slag av endurgjaldi fyri stóra amerikanska stuðulin, sum er latin í sambandi við kríggið.

Ukraina hevur ikki váttað, um Zelenskyj fer til USA at skriva undir avtaluna.