Russland góðtekur ikki vápnahvíldaravtalu, sum "setur lív í vanda"

Russiski uttanríkisráðharrin, Sergej Lavrov, sigur í samrøðu, at Russland fer ikki at góðtaka eina vápnahvíld, sum "setur lív í vanda".

Tað skriva fleiri russiskar tíðindastovur, sambært Reuters.

Lavrov endurtekur eisini støðuna hjá Russlandi um, at landið undir ongum umstøðum fer at góðtaka, at NATO-hermenn skulu vera til staðar í Ukraina, um ein varandi friðaravtala verður gjørd.

Í gjár tók Ukraina undir við einum amerikanskum uppskoti um vápnahvíld í 30 dagar, eftir at samráðingarnar hava verið millum amerikonsk og ukrainsk embætisfólk í saudiarabiska býnum Jeddah hesa vikuna.

Amerikanski uttanríkisráðharrin, Marco Rubio, sigur, sambært Reuters, at nú liggur bólturin hjá Russlandi, um at fáa vápnahvíld í lag.