Tunnilsstjórin: Skarvanes og Sandvík er samanlagt besta tunnilsleiðin

Teitur Samuelsen, stjóri í pf. Suðuroyartunlinum, er ikki í iva, at tunnilsleiðin millum Skarvanes og Sandvík er besta loysnin, nú spurnartekn verða sett við, um tað er rætt at lata tunnilin koma upp í Djúpadali við Skarvanes.

"Jarðfrøðiliga, trygdarliga og fíggjarliga er tunnilsleiðin millum Skarvanes og Sandvík besta loysnin fyri Suðuroyartunnilin," staðfestir Teitur Samuelsen, stjóri í pf. Suðuroyartunlinum.

Og fyri øll hesi trý kriteriini hevur tunnilsleiðin Skarvanes-Sandvík munin, sigur hann.

Týdning at taka eina avgerð nú

Tunnilsleiðin, ella linjuføringin, er partur av lógaruppskotinum um Suðuroyartunnil, sum var til 1. viðgerð í Løgtinginum í gjár.

Teitur Samuelsen sigur, at tað nú hevur týdning at taka eina avgerð og koma víðari við verkætlanini.